აწარმოე საქართველოში

"აწარმოე საქართველოში" პროგრამის ფარგლებში შიდ თვეში დამტკიცებული პროექტების ღირებულება 225 მილიონ ლარს აღემატება. ეკონომიკის მინისტრის გიორგი კვირიკაშვილის ცნობით, პროექტის ფარგლებში უკვე 50 პროექტია დამტკიცებული. აღნიშნულ საწარმოებში 2000–ზე მეტი ადამიანის დასაქმებაა დაგეგმილი.

"იმ პირობებში, როდესაც ჩვენს რეგიონში არ არის სახარბიელოეკონომიკური მდგომარეობა, სახელმწიფომ კიდევ უფრო მეტი აქცენტი უნდა გააკეთოს ადგილობრივი მეწარმეობის წახალისებაზე, სწორედ ამიტომ ჩვენ 2015 წლიდან პროგრამას დავამატებთ ლიზინგის კომპონენტს. ეს იმას ნიშნავს, რომ ახალი საწარმოო დანადგარების შეძენისთვის იქნება სპეციალური წამახალისებელი პროგრამები, რაც საწარმოო პარკის განახლებას შეუწყობს ხელს" - განაცხადა ეკონომიკისა და მდგრადი განვითარების მინისტრმა.

ვიცე-პრემიერის განცხადებით, პროგრამა "აწარმოე საქართველოში" არის ის საკვანძო ინსტრუმენტი, რომელიც ხელს შეუწყობს არა მარტო ეკონომიკური განვითარების დადებითი ტენდენციის შენარჩუნებას, არამედ მის უფრო მეტად ზრდასა და განვითარებას.

პროგრამის ფარგლებში დამტკიცებული 50 პროექტიდან 20 პროექტი ხორციელდება მეწარმეობის განვითარების სააგენტოს ხელშეწყობით, ხოლო 8 პროექტი - სოფლის მეურნეობის პროექტების მართვის სააგენტოს მეშვეობით. 22 პროექტისთვის, შემდგომში შესაბამისი ოდენობისა და მიზნობრიობის ინვესტიციის ვალდებულების გათვალისწინებით, ბენეფიციარებს გადაეცათ სახელმწიფოს ბალანსზე არსებული ინფრასტრუქტურა ქონების მართვის ეროვნული სააგენტოს მიერ.

პროგრამა "აწარმოე საქართველოში" სამი კომპონენტისგან შედგება: ეს არის ფინანსური მხარდაჭერა, ინფრასტრუქტურული მხარდაჭერა და საკონსულტაციო მომსახურება. პროგრამის ძირითადი მიზანია საქართველოში მეწარმეობის ხელშეწყობა, ადგილობრივი წარმოების სტიმულირება, საექსპორტო პოტენციალის გაზრდა და ახალი სამუშაო ადგილების შექმნა.